marjan.hr

PLOVI I LOVI

MOTORIN ČA NA VINO GRE (KANTA O’ PET LITRA)

 

piše

 Nađan Dumanić

 

 

Dopalo me tako jedanput ka’ san tek vazeja novi motor i vraća se sa banji na Čiovo da se vizavi Garifulina makinja udune. A ča je ni se ni steplija več zajebaje, povirin u rezervar i suvo ka prga. Bi mi je srića brat tot blizu u Lubinski porat pa san ga dozva da mi zaja po’ litre za s miron akoštat.

Govori mi moj susid u lučicu šjor File sa škal ka’ fiškal: Zvizdunu vazmeš kantu o’ pet litar benzine i tiščiš je u brod za rizervu i zaudobiš na nju. Je čovik me lipo svitova i tako i dan danas učinen.

Mene je svitova, ma sebe ni jerbo je poza par dan upa u istu trapulu. Odija je ženon učinit banj i ubrat malo pizdic ka’ isprid Ben motor izduši, nafte ni za lik, arju povuka. Ako koga zove biće štucigavanja, a vesal i rizernu pentu nima.

Mekne lipo on peraje, skoči u more i upri rukan u krmu pa udri mažinat nogan, srića da je bila kalma bonaca. Ženo uvati volantin i tišči drito na oni bili bovan na mul isprid lučice. Lipo je odilo pervi pet minuti, ma ko’ će dat force, a jema deboto još po milje. Vidi žena koja je ura pa ga pita oće li manit onemu kaiću da i povuče. Čini kuco i stisni timun, ne šetaj livo, desno i dodaj mi tu botiju vina da očistin justa.

Trefi jedan iz lučice: A ča je triba li pomoć, ne triba fala in ga, ovo malo stružen ovu travu ča se uvatila na podan broda, ne škodi nogan mrvu đinastike. Poza obilate ure struganja trave jedva je nikako doša, veza se i povuka zanji gucaj iz botije.

Razabra se i pita ženu: Je li ko vidi, dosta je da jedan buzdo trefi i znat će cili Split. A ča će mu bidna reč vengo da ni nikoga sinjala, ma je zato višje nji u fermu stalo.

Ni se ni skala na mul, omar je išla zajebancija: Čujemo da u jovu lučicu jemate motor iz Konjskoga na peraje o’ jednega konja ča troši botiju opola na uru, a gre obilati po mije. Pa sa ti pojdi ča sakrit. Boje ništa ne sakrivat jerbo se onda uduplo nadožunta.

Ka’ za pegulu je ariva oni ča svira u tejatar i  uvik se kontreštaje s Filon, ovemu je pa’ mrak na oči: samo mi je ovi piturani vlas ča mliko pije zanamisto vina falija. A ovi drito tira batudu: Je li se ovde prodaje niki motor za bajbotin, ča benzinu ne dupera, vazeja bi ga za provat koji dan, ma neka mi samo po krmi stoji da ga guštan gledat.

 

Ažurirano 11. listopada 2015 — 20:47

Autor

marjan

Sportsko Nauticka Ribolovna Udruga Marjan Split je neprofitabilna udruga građana udruženih sa ciljem promicanja nautike i ribolova, kroz sport i rekreaciju. Osnovana 30.10.1980g. kao društvo tj.S.N.R.D.Marjan. Upis u Hrvatski registar je izvršen dana 18 rujna 1998g. pod registarskim brojem 17000328.
S.N.R.U. Marjan © 2015 Frontier Theme